ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានហៅប្រធានក្រុមការងាររាជធានីភ្នំពេញគណបក្សភ្លើងទៀន លោក ស ឡុងដេត ឱ្យត្រឡប់មករាជធានីភ្នំពេញវិញខណៈដែលខំព្យាយាមរត់គេចទៅប្រទេសថៃតែមិនទាន់បានសម្រេច។

ថ្លែងក្នុងពិធីជួបជាមួយនឹងកម្មករជិត ២ម៉ឺននាក់ក្នុងខណ្ឌពោធិ៍សែនជ័យរាជធានីភ្នំពេញព្រឹកថ្ងៃទី១៣ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានលើកឡើងថា នៅពេលនេះខាងគណៈកម្មការកីឡាស៊ីហ្គេមកម្ពុជាបានដាក់ពាក្យប្ដឹងលោក ស ឡុងដេត ទៅតុលាការហើយដែលហាមឃាត់សិទ្ធិមិនឲ្យចេញក្រៅប្រទេស។

សម្ដេចបានលើកឡើងថាបើសិនជា ស ឡុងដេត ព្យាយាមចេញក្រៅប្រទេសនិងត្រូវចាប់ខ្លួនភ្លាមៗនៅព្រំដែន។

គួរឲ្យដឹងថាក្នុងជំនួបជាមួយកម្មករជាង ១ម៉ឺន ៦ពាន់នាក់នៅស្រុកកណ្ដាលស្ទឹង ខេត្តកណ្ដាល ព្រឹកថ្ងៃទី១០ ខែមិថុនា សម្ដេចតេជោ ហ៊ុន សែន ថាសម្ដេចបានតាមដានដឹងទាំងអស់នៅកិច្ចប្រជុំដែលរៀបចំដោយលោក ស ឡុងដេត ដោយបានរិះគន់ការរៀបចំស៊ីហ្គេមរបស់កម្ពុជាថាធ្វើឲ្យរដ្ឋឋាងបង់ច្រើន ខណៈដែលចំណាយស្ទើរតែទាំងអស់ទៅលើការរៀបចំនេះ៕